Уруғли ўсимликларда чангчидаги чангларнинг уруғчи тумшуқчасига (ёпиқ уруғлиларда) ёки уруғкуртакка (очиқ уруғлиларда) тушиши чангланиш деб номланади. Чангланиш икки хил бўлади: автогамия (ўз-ўзидан чангланиш) ва аллогамия (четдан чангланиш). Четдан чангланиш ўз навбатида иккига: биотик ва абиотик чангланиш усулларига бўлинади. Ўсимликларнинг чангланиш жараёнини антекология фани ўрганади.
Ўсимликларнинг сув ёрдамида чангланиши абиотик чангланишга мисол бўлиб гидрофилия деб аталади.
Гидрофилия – чангланишнинг энг кам учрайдиган ва ноодатий тури ҳисобланади. Бунда чанг доначалари уруғчи тумшуқчасига айнан сув ёрдамида етиб боради. Гидрофил ўсимликлар икки гуруҳга бўлинади:
1) Чанг доначаларини сув юзаси бўйлаб тарқатувчи ўсимликлар. Масалан, валлиснерия ўсимлигининг чангчили гуллари ўз чангини сув юзасига сочади, чанг доначалари суз юзасининг секин ҳаракати натижасида уруғчи тумшуқчаси томон оқиб боради.
2) Чанг доначаларини сув ости бўйлаб тарқатувчи ўсимликлар. Масалан, денгиз ўтларининг уруғчили гуллари сув билан қопланган ҳолда бўлади, чанг доначалари уларга сув массаси бўйлаб сузиб келиб чанглантиради.
Сув юзаси бўйлаб чангланувчи гидрофилия нисбатан кўп учрайди ва у шамол ёрдамида чангланиш билан ҳақиқий гидрофилия ўртасидаги оралиқ формага ўхшайди. Гидрилла, ботқоқчи, руппия, зостера, элодея каби ўсимликларнинг гулларига сув юзасининг мавжланиб ҳаракатланиши ёрдамида чанг доначалари етиб боради. Спиралсимон валлиснерия (Валлиснериа спиралис) ўсимлигида чанг доначалари тумшуқчагача сузиб боради. Потамогентон каби айрим денгиз ўтларида ҳам сув юзаси бўйлаб чангланиш кузатилади.
Ҳақиқий сув массаси бўйлаб чангланадиган ўсимликларга бир уруғпаллалиларга мансуб наяда туркуми вакиллари мисол бўлади. уларнинг чанг доначалари айнан сув ичида уруғчи тумшуқчасига етиб боради. Шу билан бирга Посидониа аустралис ва Зостера марина каби денгиз ўтлари ҳам айнан шу усулда чангланади.
Шу билан бирга айнан ёмғир сувлари билан чангланувчи ўсимлик турлари мавжуд. Улар ёмғир томчилари ҳисобига юзага келган ўсимлик юзасидаги кичик сув оқими ҳисобига гул чангини тарқатади. Айрим орхидея турлари атрофда табиий чанглантирувчилар миқдори камайган вақтда шу усулда ўз-ўзидан чангланади.