Атлас товускўзи (Аттакус атлас) тангачақанотлилар туркумига мансуб дунёдаги энг йирик капалаклардан бири ҳисобланади. Қанотларини ёйганда уларнинг ўлчами 25-30 см гача етади. Жануби-шарқий Осиё минтақасида тарқалган, жумладан уни Жанубий Хитой, Таиланд, Индонезия, Калимантан, Яванинг кам ёмғир ёғадиган тропик ва субтропик ўрмонларида учратиш мумкин.
Ушбу капалакларнинг ўғиз органи ривожланмаган, шу боис озиқланмайди. Қуртлик даврида жамғарган озуқаси ҳисобига яшайди. Урғочилари эркакларига қараганда нисбатан йирик бўлади. Урғочилари одатда ғумбакдан чиққанидан сўнг узоққа кетмайди. Эркакларини жалб этиш учун қорин қисмининг учки томонидаги безлардан махсус феромонларни ишлаб чиқаради. Эркаги мўйловларидаги хеморетсепторлар ёрдамида бир неча километрлардан урғочисининг ҳидини таниб, топиб келади. Уруғланган урғочи капалак барглар остига диаметри 2,5 мм бўлган тухумларини қўяди.
Икки ҳафталардан кейин тухумдан чиққан личинка фаол ҳаракатланиб ситрус дарахтларнинг барглари билан озиқланишга киришади. Личинка 11,5 см гача ўсади. Личинканинг ташқи томонида оқ тиканаклари бўлади. Вояга етган қурт дарахтга чиқиб, 7-8 см ли пилла тўқий бошлайди. Пилла ичида ғумбакка айланиб, 4 ҳафтадан кейин имаго (вояга етган ҳашарот) бўлиб чиқади.
Ғумбакдан чиққан етук ҳашарот анча нимжон бўлиб, кучини тежаш мақсадида кундузлари учмайди. Асосан тунда фаол ҳаракатланади. Уларни йилнинг исталган вақтида учратиш мумкин, лекин асосан сентабр-январ ойларида кўп учрайди. Оғиз органлари ривожланмаганлиги учун танасидаги ёғлар ҳисобига кўпайиш учун шеригини топиб кўпайгунигача бир неча кун давомида яшай олади.
Ҳиндистонда ушбу капалакнинг қуртлари хонакилаштирилган бўлиб, унинг пилласидан ўзига хос жигарранг, мустаҳкам ипак олинади. Атлас товускўзининг ипаги фагара ипаги деб номланади. Тайванда эса ушбу капалак пиллалари аёлларнинг майда катмонлари сифатида қўлланилади.